Аб мерапрыемствах, прымеркаваных да 31-й гадавіны з дня аварыі на ЧАЭС
27.04.2017 г.26 красавіка 2017 г. Пасол Рэспублікі Беларусь у Федэратыўнай Рэспубліцы Германія Д.Сідарэнка прыняў удзел у традыцыйным Дні памяці аб ахвярах Чарнобыльскай катастрофы ў г.Нінбургу (федэральная зямля Ніжняя Саксонія), які з 1991 года падтрымлівае пабрацімскія сувязі з г.Віцебскам.
Падчас урачыстай цырымоніі ля помніка “Чарнобыльская Мадона” (аўтар – беларускі скульптар І.Казак) Пасол выступіў з прывітальным словам, у якім распавёў пра наступствы катастрофы для Беларусі, намаганні па іх пераадольванні, а таксама выказаў падзяку Ураду і грамадзянам Германіі за гуманітарную дапамогу і салідарнасць. Да прысутных таксама звярнуўся бургамістр г.Нінбурга Х.Онкес, кіраўнік грамадскай ініцыятывы “Памяць” Т.Гатэр. Выступоўцы надалі асаблівую ўвагу неабходнасці захавання памяці пра ахвяр Чарнобыльскай і Фукусімскай трагедый і мерам па недапушчэнню паўтарэння падобных падзей.
У мерапрыемстве ўдзельнічалі прадстаўнікі гарадской адміністрацыі, грамадскіх аб’яднанняў, царкоўных колаў, гуманітарных арганізацый, СМІ.
Візіт кіраўніка беларускай дыпламатычнай установы ў г.Нінбург быў згаданы ў пазітыўным ключы ў рэгіянальных СМІ.
У гэты ж дзень прадстаўнік Пасольства Беларусі ў ФРГ прыняў удзел у мерапрыемствах у гг.Вольфенбютэль і Зальцгітэр (федэральная зямля Ніжняя Саксонія), прымеркаваных да 31-й гадавіны з дня аварыі на Чарнобыльскай АЭС, у рамках Экалагічнага фестывалю “Дзеля будучыні пасля Чарнобыля і Фукусімы”, які праводзіўся пры падтрымцы Дортмундскага міжнароднага адукацыйнага цэнтра з мэтай прыцягнуць увагу нямецкай грамадскасці да такіх тэм, як перспектывы атамнай энергетыкі, пашырэнне выкарыстання аднаўляемых крыніц энергіі, ахова навакольнага асяроддзя.