:

Гандлёва-эканамічныя адносіны

Германія традыцыйна з’яўляецца адным з вядучых знешнегандлёвых партнёраў Беларусі. У 2021 годзе яна заняла чацвёртае месца па аб’ёме тавараабароту (па аб’ёме экспарту – пятае месца, імпарту – трэцяе месца). 


Аснову беларускага экспарту ў ФРГ складаюць прадукцыя лясной і дрэваапрацоўчай прамысловасці, некаштоўныя металы і вырабы з іх, мінеральныя прадукты. У 2021 годзе амаль на 80% павялічыліся пастаўкі ў Германію беларускай прадукцыі сельскай гаспадаркі і харчовай прамысловасці, больш чым на 50% – машын і абсталявання. 

Ключавымі пазіцыямі імпарту з Германіі ў Беларусь з’яўляюцца машыны, апаратура і абсталяванне, транспартныя сродкі, хімічная прадукцыя, лекавыя прэпараты. 

Важным напрамкам эканамічнага ўзаемадзеяння з’яўляецца сфера паслуг, дзе забяспечваецца ўстойліва дадатнае сальда для Беларусі. У 2021 годзе экспарт паслуг у ФРГ вырас на 8,6% да 532,3 млн. долараў, імпарт скараціўся на 17% да 128,5 млн. долараў. Дадатнае сальда склалася ў памеры 403,8 млн. долараў. 

У мэтах садзейнічання развіццю гандлёвага і інвестыцыйнага супрацоўніцтва паміж дзвюма краінамі створаны двухбаковыя інстытуцыянальныя фарматы, уключаючы Беларуска-германскую рабочую групу па гандлі і інвестыцыях. 

Рэгулярна праводзяцца эканамічныя мерапрыемствы, у тым ліку ў рэжыме анлайн: тэматычныя форумы і семінары, канферэнцыі, прэзентацыі. Наладжана ўзаемадзеянне па лініі Усходняга камітэта германскай эканомікі, Федэральнага саюза малога і сярэдняга бізнесу Германіі, Нямецка-беларускага эканамічнага клуба. Кантакты паміж бізнес-коламі дзвюх краін ажыццяўляюцца ў тым ліку ў рамках Беларуска-германскага савета дзелавога супрацоўніцтва. 

Важным інструментам развіцця дзелавых кантактаў і ўмацавання гандлёва-эканамічнага ўзаемадзеяння з’яўляюцца міжнародныя выставачныя мерапрыемствы, у якіх удзельнічаюць прадстаўнікі бізнесу і органаў дзяржаўнага кіравання Беларусі і Германіі. Беларускія дэлегацыі традыцыйна прымаюць удзел у буйных выставах у ФРГ, якія праводзяцца ў тым ліку ў анлайн-фармаце: Міжнародны сельскагаспадарчы кірмаш «Зялёны тыдзень» («Grüne Woche»), Міжнародная турыстычная біржа «ITB», Гановерская прамысловая выстава («Hannover Messe»), Міжнародная мэблевая выстава «IMM Cologne», Міжнародная выстава гатовых прадуктаў харчавання і напояў «ANUGA», выставы жывёлагадоўлі «EuroTier» і сельскагаспадарчай тэхнікі «Agritechnica». Прадстаўнікі германскага бізнесу прымаюць удзел у беларускіх выставачных мерапрыемствах (Міжнародная выстава «Белагра», Беларускі прамыслова-інавацыйны форум і іншыя).

 У 2021 годзе з Германіі прыцягнута інвестыцый на суму 121,2 млн. долараў, у тым ліку прамых – 114,1 млн. долараў, прамых на чыстай аснове – 48,4 млн. долараў. 
 

Дыпмісіі Беларусі за мяжой

Усе дыпмісіі Сайт МЗС
Перайсці